புத்தகம்

புத்தகங்கள் பற்றிய பார்வைகளைப் பதியும் எங்கள் வலைப்பூ - http://puththakam.blogspot.com/

Saturday, February 15, 2020

சவப்பெட்டியின் வாசகன்

ஒரு
சவப்பெட்டியாகத்தான்
இருந்திருக்கிறது
அந்த கவிதைப் புத்தகம்

கிழித்த பக்கத்தில்
என்ன கவிதை
இருந்திருக்கக்கூடும்

கவிதை வாசிக்க வந்தா
நசுங்கிச் செத்துப் போனாய்
நீ?

உன் மரணத்தின்
கடைசி நொடியில்
நான் எந்தக் கவிதையின்
சிலாகிப்பில் இருந்திருப்பேனோ

உன் பிணத்தை
மென்மையாக அப்புறப்படுத்திய நாளில்
நான் கவிதையெதுவும் வாசிக்கவில்லை.

Sunday, January 26, 2020

மனிதாசனம்

இரண்டு கால்களில்
நின்ற வண்ணம்
யோகா செய்யத்
தொடங்கியிருந்தது
ஒரு நாய்

முதலில்
முன்னிரு கால்கள்
பிறகு
பின்னிரு கால்கள்

தீவிர பயிற்சியினிடையே
மனிதாசனம் என்றதற்குப்
பெயர் சூட்டியது

ஆண்டின் இறுதிக்குள்
ஐந்து கிலோ
எடை குறைப்பதெனச்
சபதமேற்றிருந்தது அது

உழைப்பற்ற தன் 
உடலின் எடை குறைக்க 
மாரத்தானும் 
மலையேற்றமும் 
ஜும்பா நடனமும் 
இத்யாதி இத்யாதிகளும் 
முன்பே முயன்று பார்த்திருந்ததாம் 

குளிரூட்டப்பபட்ட 
அறையைத் தவிர்த்து 
எடையை வியர்வையாகக் கரைக்கும் 
முனைப்பும் இருந்ததாகப் பேச்சு 

இரவு நேரப் 
பெடிக்ரீயில் ஒரு பகுதி 
மீதம் வைப்பதாகக் 
கூடுதல் தகவல் 

பின்னர்
ஒரு நாளின்
இருள் பிரியாத அதிகாலையில்
கடற்கரையில் கைவீசி
நடக்க ஆரம்பித்திருந்தது ,
உறக்கம் கலையாத
ஒரு மனிதனை இழுத்துக்கொண்டு 

Wednesday, January 01, 2020

விளக்கு

பின்னிரவில் அப்பிக்கிடக்கும்
மாயிருளுக்குள் புதைந்திருக்கிறது
புது வருடத்தின்
ஒவ்வொரு கணமும்

நமக்கென நாமே
செய்துகொண்ட விளக்கு
இருளைத் தின்றழித்துக்
கட்புலனாக்கிவிடும்
நகரும் நாட்களில்

நானும் நீயும்,
காண்பதும் மறைவதும்,
ஒன்றாகவும் வெவ்வேறாகவும்,
தொடர்கிறது விளையாட்டு

ஒளிவதும் தெரிவதும்
ஒவ்வொரு விளக்கின்
ஒளிநீளம் பொறுத்தது
என்பதுதானே சூட்சுமம்

சுமக்கும் கைகளே
செய்வதும் ஆகையால்
இன்றேனும் வாய்க்கக்கூடும்
எல்லாம் காட்டும்
நந்தா விளக்கு 

Friday, May 17, 2013

அந்தரங்கம்

இறந்தவர்கள் எழுதிவைத்த
நாட்குறிப்புகளைச் சேகரிக்கும்
வினோத பழக்கம் கொண்ட மனிதனின்
நாட்குறிப்பை வாசிக்கும் சந்தர்ப்பம்
அவன் இறந்த பிறகு கிடைத்ததெனக்கு

தன் ஆராய்ச்சியின் பலனாக
மூன்று முக்கிய முடிவுகளை அறிவித்திருந்தான் அவன்

இப்போதெல்லாம் மனிதர்கள்

அதிகமாக நாட்குறிப்பு எழுதுவதில்லை

எழுதுபவர்களில் பெருமளவு

அதை அடுத்தவர் வாசிப்பதை மிகவும் விரும்புகிறார்கள்

இரண்டாம் முடிவின் விளைவாகவும்
அவர்களின் அந்தரங்கம் புதைந்தே போகிறது
முன்னெப்போதைப்போலவும்

Tuesday, May 07, 2013

சிதைவுப் புள்ளி

நான்கு சாலைகள்
சந்திக்கும் புள்ளியில்
காத்திருக்கிறேன்

ஒரு குழந்தையின் எதிர்பார்ப்புடன்
கிடக்கிறது மனது

எத்திசையிலிருந்தும் வரக்கூடும்
என்னைச் சிதைக்கப் போகும்
விபத்தின் கணம்
காற்றைப் போல லேசாக....