வாழ்க்கைச் சுழற்சி

விடுதலையாகிறது காற்று
வெடித்துச் சிதறுகிறேன் நான்
அமைதியாக உருவாக்கப்படுகிறது
அடுத்தொரு நீர்க்குமிழி.

இது என்ன காதல்....?

இன்றோடு
என்னைப்பிரிகிறாய் நீ!

உன்
தனிமையில்
துணையாய் வந்தவன்
தானே நான்!

நம் மூச்சுக்காற்றைப்
பரிமாறிக் கொண்ட கணங்களில்
என் உயிரின் நீளம்
அதிகரிப்பதை
உணர்ந்திருக்கிறேனே
நான்!

நீ முத்தமிட்டனுப்பிய
காற்றை
நுரையீரலில்
நிரைத்துக் கொண்டு
திரிந்தேனே!

உன் செல்லத் தூறலில்
நனைவதற்காக
மழை விட்டபொழுதுகள் வேண்டி
அலைந்தவன் தானே நான்!

எல்லோருக்கும் தெரிந்து தானே
வளர்ந்தது நம் உறவு?

இன்றோடு என்னிலிருந்து
பிரிக்கப்படுகிறாய் நீ!

அது சரி,

கட்டுபவனைப் போல
வெட்டுபவனுக்கும்
புரிவதில்லை
ஒரு முன்னாள் காதலனின் சோகம்!

குழூஉக்குறி

அப்போதெல்லாம்
யாரையும் பெயர் வைத்து
அழைத்ததாய் ஞாபகம் இல்லை

ராமாயணக்கதை கேட்டதிலிருந்து
சூர்ப்பனையாகிப் போயிருந்தான்
வெங்கடேசன்

கோடை காலம் வந்தாலே
பாட்டி வீட்டில் அடைக்கலம் சேரும்
வேணுவுக்குக்
குள்ளப்பாண்டி என்று பெயர்
வைத்ததாய் ஞாபகம்

இப்படித்தான்....
நடுவிரல் சித்தப்பா
சுடுதண்ணி சுப்பு
தவக்களை

இன்னும் கூட
இப்படியேதான்
இருந்திருப்பேன்,

கல்லூரி காலத்தில்
"கரி"
என்பது
எனக்கான
குழூ உக்குறியாய்
இல்லாதிருந்தால்...

ஒரு சின்னஞ்சிறு கதை

மேலிருந்து தவறி விழுந்தபோது, அவனோடு பலமாக மோதிக்கொண்டேன். என்னை நானே திட்டிக் கொண்டு எழுந்து போனேன். போன முறை சண்டை போட்ட யாரோ போலல்லாமல் அமைதியாக எழுந்து போய்விட்டான் அவனும், என்னுடனேயே!

நடப்பது

நெரிசலுக்கிடையே
நான்நீண்ட நேரமாய்ப்
பார்த்துக்கொண்டிருக்கும் பெண்
எதேச்சையாய்
என் முகம் பார்த்துவிடுவாளோ?

காலியாய் இருக்கும்
பக்கத்து சீட்டில்
குடிகாரன் எவனும்
உட்கார்ந்து விடுவானோ?

கூட்டமாய் மாதர்கள்
நிற்கும் நிறுத்தத்தில்
என்னை அறியாமல்
இறங்கிவிடுவேனோ?

அடிக்கடி வந்து போகும்,
சில நொடி தூக்கத்தில்
சில்லறை பாக்கி
மறந்து போவேனோ?

பயத்தினூடே
ரசிக்கப்படாமலேயே கழிகிறது
ஒவ்வொரு பேருந்துப் பயணமும்...
-----------------------------------
சுகுணா திவாகரின் "தீட்டுப்பட்ட நிலா" படித்தபின்,
அவரைப் போலவே முயற்சி செய்து.... சூடுபட்டுக் கொண்டேன்.
************************************
இதன் "மூலம்" அறிந்த நண்பர்களுக்கு.....
நான் எழுதியதை அப்படியே வெளியிடும் தைரியம் இன்னும் வரவில்லை.

அசைவம்

அசைவமாகிறது மர(ன)ம்,
இறைச்சி விற்கும் தெருவில்
இரவலனாய் நான்.

படித்ததில் பிடித்தது...

அந்த விபத்து நடந்தவுடன்,
எல்லோரும் ஒரு வினாடி ஸ்தம்பித்து,
மீண்டும் நகர்ந்தனர்.
அன்றிரவு,
அவர்கள் ஒரு வினாடி
தாமதமாய்த் தூங்கப் போயினர்.